عادي بروح رياضية جمهور البرشا
خضر الميسري
اليوم بما أن النصر مضمون قلت بروح اتفرج الحمراء اجيت متأخر شوية والانتر متقدم أول ما خلص الشوط الأول قدامي 15 واحد من جماعة البرشاء قاموا اللي عطف الفرش واللي عطف السجادة والي عطف كرتونه واللي لف المجلس حقه المهم عصدونا ثلاث دقائق وهم يوالفون حاجاتهم .
اول ما بدأ الشوط الثاني والمكان جنبي تمام ومرتاح جلسوا جنبي أربعة مشجعين البرشاء مشجعين للعظم واحد يحلف بيرجعون والثاني يقول إن شاء الله نفوز والثالث يقول دوول جمهور الريال لو بقيت جنبهم شوية بضاربهم .
على العموم قلت لواحد منهم جمهور البرشا روحوا قال نحن محبين مش متفرجين بجلس لهم للفجر قلت في نفسي يا ذا المصيبة من المتابعين ذوول .
المهم البرشا لطموا الأول والثاني والثالث أنا قمت لقطت ساماني ومشيت وفي بالي أن المباراة انتهت وصلت الحافة حقي والناس تتابع واسمع اصوات وتشجيع قلت ايش في مش معقول الشارع كله يتابع التعليق .
وصلت ركن البيت العيال يصيحون لي الانتر أربعة والبرشا ثلاثة
ما صدقت جلست اتابع وقلت يا الله يا خضر بروح للعيال اللي كانوا يشجعون برشلونة بنكد عليهم زيما نكدوا جلستي.
اشتغل العقل عندي وقال لي اجلس شفك تدور حرش ومشاكل
الجماعة وضعهم صعب وحالتهم النفسية تعبانة والكهرباء طافي والحما اشتد والسلاخ مرهق .
ليلتكم سعيدة يا جمهورنا العظيم .
