المسؤولون يترجمون بعطب.. والشعب هو السبب !
فهد العكمة
والله عيب، عيب كبير لما نشوف قيادات ما تخجل لا من الله ولا من الناس. يتراجمون بعطب، وكانهم في حرب كلامية، تستغرب كيف وصلوا لمناصب علياء ومؤهلات تفوق التصورات، وهم ما يفرقون بين البيضة والحجر، ولا عندهم أي حلول لأي أزمة تمر بها البلاد؟
تصريحاتهم؟ حدث ولا حرج تجيب لك القهر . بدل ما يواجهوا الواقع ويحاولوا يلاقوا حلول، يطلعوا بتصريحات سخيفة، يقولون بكل برود: "ما لنا دخل بالأوضاع، وبكل مهزلة القادم اجمل! مهمتنا نحافظ على الكرسي والمبنى". يعني المواطن يواجه الأزمات لوحده، وهم مشغولين بالكراسي والمكاتب.
لكن، خلونا نكون صريحين. المشكلة مش بس فيهم، المشكلة فينا نحن كمان. نحن اللي نعطي ولاءنا للفساد والمفسدين، وكأننا نخاف من فكرة دولة بنظام وقانون. نهرب من المساواة والعدل، ونتمسك بأفكار "أنا قبيلي"، "أنا ابن فلان وعلان "، انا "أبوي شيخ وسلطان".
ياجماعة إلى متى؟ إلى متى نظل ندور في نفس الدائرة؟ إذا ما وقفنا وقفة جادة مع أنفسنا، وقررنا نغير هذا الواقع، بنظل ندفع الثمن، والثمن غالي جدًا. التغيير يبدأ من الشعب، من كل واحد فينا، لما نقرر نختار الأفضل ونحاسب الفاسدين. هذا حالنا، وهذا واقعنا، لكن الأمل موجود اذا غيرنا الجماعة اللصوص ، والتغيير ممكن لو صدقنا مع أنفسنا ووقفنا ضد كل فساد وظلم ولص ينهب ويتكلم باسم الوطن فعلنا تركنا وهو في الخارج او في قصر بالداخل ولا عارف بهذا الشعب، اين ربي طرحه؟
